Մահացել է իտալացի հռչակավոր դերասանուհի Կլաուդիա Կարդինալեն (իսկական անունը՝ Կլոդ Ժոզեֆինա Ռոզ Կարդինալե), հաղորդում է ANSA-ն։
Նրա մենեջեր Լորան Սամրին Corriere della Sera-ին ասել է, որ 87-ամյա Կարդինալեն մահացել է «իր երեխաների շրջապատում» Փարիզի մոտ գտնվող Նեմուր քաղաքում, որտեղ նա ապրել է իր կյանքի վերջին տարիներին։
Նշենք, որ Կարդինալեն մասնակցել է այնպիսի կինոնկարների ստեղծմանը, ինչպիսին են Ֆեդերիկո Ֆելինիի «Ութ ու կեսը (8 1/2, 1963), Լուկիանո Վիսկոնտիի «Հովազը» (Il Gattopardo, 1963), Սերջո Լեոնեի «Մի անգամ վայրի արեւմուտքում» (C’era una volta il West, 1968), «Մայրիկ» (1991) ֆիլմերը:
Բայց Կլաուդիա Կարդինալեն արժանացել է հայ հանդիսատեսի առանձնահատուկ հարգանքին ու սիրուն՝ ֆրանսիահայ ռեժիսոր Անրի Վերնոյը (Աշոտ Մալաքյան) «Մայրիկ» ֆիլմում մարմնավորելով ընտանիքի մոր անմոռանալի կերպարը: Այդ ֆիլմում՝ ցեղասպանությունից մազապուրծ և Ֆրանսիայում ապաստանած հայկական ընտանիքի հոր կերպարն էլ մարմնավորել էր եգիպտացի սիրված դերասան Օմար Շարիֆը:
«Մայրիկն» առանձնահատուկ է նաև այն տեսանկյունից, որ Կարդինալեն ու Շարիֆն, այլազգի լինելով, այնքան խորն են զգացել ու վերապրել իրենց ներկայացրած կերպարները, որ հենց հայ հանդիսատեսը նրանց որպես հարազատ ու յուրային է ընկալել: Թերևս ավելորդ է ասել, որ ֆիլմի ցուցադրությունից հետո թուրքերը փորձել են հետապնդել Կարդինալեին:
Հիշատակն արդարոց օրհնությամբ եղիցի:
