Բռնցքամարտի Հայաստանի տղամարդկանց և կանանց հավաքականներն ապրիլի 20-26-ը Բրազիլիայի Ֆոս դու Իգուասու քաղաքում կմասնակցեն աշխարհի գավաթի խաղարկության առաջին փուլին։
2026 թվականի մրցաշրջանում սա World Boxing-ի առաջին խոշոր մրցաշարն է: Տղամարդկանց պայքարում Հայաստանը կներկայացնեն 50 կգ քաշային Ռուդոլֆ Գարբոյանը, 55 կգ քաշային Ժիրայր Սարգսյանը, 60 կգ քաշային Արթուր Բազեյանը, 65 կգ քաշային Արթուր Սահակյանը, 70 կգ քաշային Արարատ Հարությունյանը, 90 կգ քաշային Նարեկ Մանասյանը, +90 կգ քաշային Դավիթ Չալոյանը։
Հայաստանի տղամարդկանց հավաքականի գլխավոր մարզիչ Ռուդիկ Մկրտչյանը ներկայացրել է նախապատրաստական աշխատանքները՝ նշելով, որ թիմը մարզումները սկսել է Ծաղկաձորում՝ փուլ առ փուլ բարձրացնելով մարզիկների ֆիզիկական և տեխնիկական պատրաստվածությունը։ Թիմը մրցավայր կմեկնի ապրիլի 17-ին։
«Կարծում եմ՝ մարզիկները լավ են պատրաստվել։ Թե ինչ արդյունք կգրանցենք, ցույց կտա ռինգը, սակայն մի բան հաստատ է՝ թե՛ տղաները, թե՛ աղջիկները ջանք չեն խնայել լավագույնս պատրաստվելու համար»,- ասել է նա։
Կանանց պայքարում Հայաստանը երկու ներկայացուցիչ կունենա՝ 51 կգ քաշային Անուշ Գրիգորյանը և 65 կգ քաշային Էլիդա Քոչարյանը։ Նրանք հանդես կգան Վազգեն Բադալյանի գլխավորությամբ: Անուշ Գրիգորյանի խոսքով՝ շատ լուրջ են մոտենում այս կարևոր մրցաշարին:
Աշխարհի գավաթի խաղարկությունն անցկացվելու է երեք փուլով։ Բրազիլիայում կայանալիք առաջին փուլում 1/8 եզրափակիչ դուրս եկած բռնցքամարտիկները կշարունակեն պայքարը երկրորդ փուլում, որը կկայանա Չինաստանում։ Եզրափակիչ փուլը կանցկացվի Տաշքենդում:
Աղբյուրը՝ sportmedia.am
