Կան պահեր, երբ իրականությունն ասում է ավելին, քան ցանկացած խոսք․Մհեր Մելքոնյան

Արդեն երկրորդ կիրակին է, ինչ Շիրակի թեմի առաջնորդ Գերաշնորհ Տ. Միքայել արքեպիսկոպոս Աջապահյան-ը մասնակցում է Սուրբ Պատարագին։ Եվ այս երկու կիրակիները վերածվել են ոչ թե սովորական եկեղեցական արարողությունների, այլ՝ հասարակական ու բարոյական հստակ ուղերձի։

Այսօր էլ էր Առաջնորդանիստ` Ս. Աստվածածին եկեղեցին (Ս. Յոթ Վերք) լեփ-լեցուն հավատացյալներով։ Սրբազանի մասնակցությամբ Սուրբ Պատարագը չի սահմանափակվել միայն հոգևոր արարողությամբ․ այն դարձել է ժողովրդի վճռական ու աներկբա գնահատականը՝ վստահության, հավատքի և ազգային արժանապատվության վկայություն։

Սա պատահականություն չէ, ոչ էլ պահի ազդեցություն։

Սա վստահության, հեղինակության և տարիների նվիրումի արդյունք է։

Գերաշնորհ Տ. Միքայել արքեպիսկոպոս Աջապահյանը այսօր պարզապես հոգևորական չէ։ Նրա կերպարը մարմնավորում է այն սակավաթիվ, բայց կենսական կարևոր տեսակը՝ արժանապատիվ հոգևորական, սկզբունքային մարդ և իսկական հայրենասեր հայ։

Իսկ այսօրվա Սուրբ Պատարագը ոչ թե պահի արձագանք է, այլ՝ խորքային գործընթաց, որտեղ ժողովուրդը իր ներկայությամբ վերահաստատում է իր հավատքի, արժեհամակարգի և ազգային ինքնության անքակտելի կապը։ Այնտեղ, որտեղ կա սկզբունքայնություն, ճշմարտության հանդեպ հավատարմություն և ծառայության բարձր գիտակցում, ձևավորվում է այն վստահությունը, որն ունի երկարաժամկետ ուժ և ազդեցություն։

Եկեղեցու լեփ-լեցուն լինելը խոսում է ոչ միայն հոգևոր կյանքի ակտիվության, այլև հասարակության ներքին դիմադրողականության մասին՝ բոլոր այն փորձերի նկատմամբ, որոնք միտված են արժեզրկել ազգային ու հոգևոր հիմքերը։ Սա լուռ, բայց անսասան հենասյուն է, որի վրա կանգնած է ժողովրդի ինքնությունը։

Եվ երբ այս հենասյունը ամուր է, ոչ մի արտաքին կամ ներքին ճնշում ի զորու չէ խարխլել այն։

Որովհետև այստեղ գործում է ոչ թե պահի ազդեցությունը, այլ՝ պատմության և հավատքի շարունակականությունը։

Աստված օգնական, Սրբազան Հայր։