Մեր հասարակության առաջնահերթությունը պետք է լինի ձևավորել հստակ ազգային օրակարգ.Մհեր Մելքոնյան

Պետությունը չի քանդվում մեկ օրում։ Այն քայքայվում է փուլ առ փուլ՝ սկզբում արժեհամակարգի նսեմացմամբ, ապա ինստիտուտների թուլացմամբ, և վերջում՝ ազգային նպատակների խեղմամբ։ Այսօր այդ բոլոր գործընթացները, ցավոք, տեսանելի են։

Երբ իշխանությունը կորցնում է իր ռազմավարական տեսլականը և սկսում առաջնորդվել իրավիճակային հաշվարկներով, պետությունը դառնում է խոցելի։ Երբ ազգային շահը փոխարինվում է քաղաքական հարմարավետությամբ, առաջանում է այն վտանգավոր վակուումը, որը սպառնում է երկրի անվտանգությանը, ինքնիշխանությանը և ապագային։

Այսօր մենք ականատես ենք մի իրականության, որտեղ հասարակությանը աստիճանաբար սովորեցնում են ցածր սպասելիքների, պարտության հոգեբանության և սահմանափակված հավակնությունների։ Սա ամենավտանգավոր ճանապարհն է, որովհետև այն ոչ միայն թուլացնում է պետությունը, այլ կոտրում է ժողովրդի կամքը։

Այս իրավիճակը նաև փորձություն է մեր հասարակության համար։ Պատմությունը ցույց է տվել՝ ամենածանր փուլերում հաղթում են այն ազգերը, որոնք կարողանում են համախմբվել, վերագտնել իրենց արժեքները և վերականգնել պետական մտածողությունը։

Մեր հասարակության առաջնահերթությունև պետք է լինի ձևավորել հստակ ազգային օրակարգ, առաջարկել համակարգային լուծումներ և վերականգնել հասարակության վստահությունը պետական ինստիտուտների նկատմամբ։ Պետք է կառուցվի այնպիսի պետություն, որտեղ օրենքը գերակա է, պատասխանատվությունը՝ անխուսափելի, իսկ ազգային շահը՝ անսակարկելի։

Այսօր յուրաքանչյուր քաղաքացի կանգնած է ընտրության առաջ՝ լինել լուռ դիտորդ, թե՞ դառնալ պահանջատեր։

Եվ այստեղ պետք է հստակ գիծ քաշել։

Պետությունը չի կարող լինել թույլ, եթե ժողովուրդը պատրաստ է այն պաշտպանել։

Պետությունը չի կարող կորցնել իր արժանապատվությունը, եթե հասարակությունը չի հաշտվում դրա կորստի հետ։

Թող հստակ արձանագրվի՝ Հայաստանի ապագան չի կարող կառուցվել պարտության, վախի և անորոշության վրա։ Այն պետք է կառուցվի արժանապատվության, ուժի և ազգային միասնության հիմքի վրա։

Յուրաքանչյուր որոշում, որը հակասում է այս սկզբունքներին, վաղ թե ուշ ստանալու է իր գնահատականը՝ թե՛ պատմության, թե՛ օրենքի, թե՛ ժողովրդի կողմից։

Եվ այն օրը, երբ Հայաստանում կվերականգնվի լիարժեք ազգային և պետական իշխանությունը, լինելու է շրջադարձային օր՝ արդարության, պատասխանատվության և պետականության վերածննդի օր։